பெட்ரோல் விலை மீண்டும் லீட்டருக்கு ரூ.1.35 வரை உயர்த்தப்பட இருப்பதாக இந்தியன் ஆயில் கார்பரேஷன் நிறுவன தகவல்கள் தெரிவிக்கின்றன.
கடந்த மே 15ம் திகதி லீட்டருக்கு ரூ.5 ஆல் பெட்ரோல் விலை உயர்த்தப்பட்டிருந்ததுடன், விரைவில் டீசல், சமையல் எரிவாயு விலையும் உயர்த்தப்படவிருந்தன.


இந்தியன் ஆயில் கார்பரேஷன் நிறுவன சேர்மென் புதோலா

இந்நிலையில், சர்வதேச சந்தையில் கச்சா எண்னெய் விலையுடன் ஒப்பிடும் போது, எம்மால் தாக்குபிடிக்க முடியவில்லை. லீட்டருக்கு ரூ.5 ஆல் பெட்ரோல் விலையை உயர்த்திய பிறகும், தமக்கு ரூ.4.58 நஷ்டம் ஏற்படுவதாக அந்நிறுவனங்கள் தெரிவித்திருந்தன.


இதனால் மீண்டும் பெட்ரோல் விலையை ரூ.1.35 ஆக உயர்த்த உள்ளதாகவும் நாளை (புதன்கிழமை) முதல் விலையேற்றம் அமலுக்கு வருவதாகவும் இந்தியன் ஆயில் கார்பரேஷன் நிறுவனம் தெரிவித்துள்ளது.

இதேவேளை, டீசல், மண்ணெணேய், உள்ளிட்ட பெட்ரோலிய பொருட்களில் விலையை உயர்த்த வேண்டுமென பொதுத்துறை எண்ணெய் நிறுவனங்கள் வலியுறுத்தியுள்ளதுடன், மத்திய அர்சைன் கட்டுப்பாட்டில் உள்ள இம்மூன்று பொருட்களின் விலையை நிர்ணயிப்பது தொடர்பாக மத்திய நிதியமைச்சர் பிரணாப் முகர்ஜியுடன் தொடர்ந்து பேச்சுவார்த்தையில் ஈடுபட்டுள்ளன.

கடந்த சில தினங்களாக பெய்து வரும் அடைமழையினால் ஏற்பட்ட வெள்ளம் மற்றும் மண்சரிவு போன்ற அனர்த்தங்களினால் உயிரிழந்தோர் எண்ணிக்கை 8 ஆக உயர்ந்துள்ளதாக இடர் முகாமைத்துவ மத்திய நிலையத்தின் பணிப்பாளர் பிரதீப் கொடிபிலிப்பு தெரிவித்தார்.
கம்பஹா கொழும்பு களுத்துறை காலி குருனாகல் கேகாலை மற்றும் இரத்தினபுரி ஆகிய 7 மாவட்டங்களைச் சேர்ந்த 6 ஆயிரத்து 507 குடும்பங்களைச் சேர்ந்த 24 ஆயிரத்து 300 பேர் பாதிக்கப்பட்டுள்ளதுடன் 50 வீடுகள் முற்றாக சேதமடைந்துள்ளதாகவும் 234 வீடுகள் பகுதியளவில் சேதமடைந்துள்ளதுடன் 15 குடும்பங்களைச் சேர்ந்த 67 பேர் முகாம்களில் தங்க வைக்கப்பட்டுள்ளதாகவும் பணிப்பாளர் கூறினார்.

சில தினங்களாக நாட்டின் பல பாகங்களிலும் பெய்து வரும் அடை மழையினால் பல தாழ்நில பகுதிகள் வெள்ளத்தினால் மூழ்கியதுடன் அவ்வாறான பகுதிகளில் போக்குவரத்து மற்றும் மக்களின் இயல்பு வாழ்க்கை என்பன பெரிதும் பாதிக்கப்பட்டுள்ளன.

இதேபோன்று பல மேட்டு நிலப் பகுதிகளில் பெய்து வரும் கடும் மழையினால் மண்சரிவு போன்ற அனர்த்தங்கள் ஏற்பட்டு பாதிப்புகள் ஏற்பட்டுள்ளன. இதனால் இயல்பு வாழ்க்கையும் பெரிதும் பாதிக்கப்பட்டுள்ளது.

குறித்த அனர்த்தங்களினால் பாதிக்கப்பட்ட மக்களுக்கான அனர்த்த நிவாரண சேவைகளை அந்தந்த மாவட்ட பிரதேச செயலகங்களினூடாக மேற்கொள்ளப்பட்டு வருவதாகவும் இடர் முகாமைத்துவ மத்திய நிலையம் தெரிவிக்கின்றது.

இந்தியாவில், ஜூன் 15ம் தேதி, முழு சந்திர கிரகணம் தெரியும் என, தமிழக அறிவியல் மற்றும் தொழில்நுட்ப மையம் தெரிவித்துள்ளது.இது குறித்து, மையத்தின் நிர்வாக இயக்குனர் இளையபெருமாள் கூறுகையில், "ஜூன் 15ம் தேதி, முழு சந்திர கிரகணம், இந்தியாவில் தெரியும். அதை வெறும் கண்களாலேயே பார்க்க முடியும். இந்தியா தவிர, தெற்காசியா, ஆப்ரிக்கா மற்றும் ஆஸ்திரேலியா நாடுகளிலும் இந்த கிரகணம் தெரியும். வரும் ஜூன் 2ம் தேதி நிகழும் சூரிய கிரகணம், இந்தியாவில் தெரியாது,'' என்றார்.

அடுத்த இரண்டு வாரங்களில் மத்திய அமைச்சரவை விஸ்தரிக்கப்பட உள்ளது.ரயில்வே அமைச்சர் பதவியை வகித்த மம்தா பானர்ஜி மேற்கு வங்க முதல்வராகி விட்டார். மத்திய அமைச்சராக இருந்த பிருதிவிராஜ் சவுகான் மகாராஷ்டிர முதல்வராகி விட்டார். ஸ்பெக்ட்ரம் ஊழல் விவகாரத்தில் ராஜா அமைச்சர் பதவியிலிருந்து விலகியதால், தொலைத்தொடர்புத் துறையை மத்திய மனிதவள மேம்பாட்டுத்துறை அமைச்சர் கபில் சிபல் கூடுதலாக கவனித்து வருகிறார்.எனவே, மத்திய அமைச்சரவையில் ஏற்பட்டுள்ள வெற்றிடங்களை நிரப்பும் பொருட்டு, இன்னும் இரண்டு வார காலத்தில் மத்திய அமைச்சரவை விஸ்தரிக்கப்படலாம் மற்றும் புதிய அமைச்சர்கள் நியமனம் நடக்கலாம் என, மத்திய அரசு வட்டாரங்கள் தெரிவித்துள்ளன.

ஒரிசாவில் அம்மாநில அமைச்சர் ஒருவர் ஓரே ஆண்டில் 10-ம் மற்றும் 12-ம் வகுப்புக்கான தேர்வுகள் எழுதி தேர்ச்சி பெற்று்ளார். ஓடிசாவில்,பழங்குடியினர் மேம்பாடு மற்றும் தகவல் தொழில்நுட்பத்துறை அமைச்சராக இருப்பவர் ரமேஷ்சந்திரா மஜ்கி (33) இவர் கடந்த1990- 1995-ம் ஆண்டுகளில் தனது தந்தை ஜாதவ் மஜ்கி ,தொழி்ற்துறை அமைச்சராக இருந்த போது இவர் நவராங்பூர் மாவட்டத்தில் உள்ள பள்ளியில் படித்து கொண்டிருந்தார். இப்பள்ளியில் நடத்தப்பட்ட 10-ம் மற்றும் 12-ம் வகுப்புதேர்வுஎழுதினார். இதி்ல் அவருக்கு தோல்வி ஏற்பட்டது. இந்நிலையில் அவரது தந்தை ஜாதவ் மஜ்கி இறந்ததும் படிப்பை நிறுத்திவிட்டு தந்தையைப்போல தீவிர அரசியலில் நுழைந்தார். படிப்படியாக அரசியல் செல்வாக்கு பெற்று. கடந்த 2004-ம் ஆண்டு சட்டசபை தேர்தலில் நவராங்பூர் தொகுதியில் போட்டியி்ட்டு வெற்றி பெற்றார். பின்னர் கடந்த 2009-ம் ஆண்டு நடந்த சட்டமன்ற தேர்தலிலும் போட்டியிட்டு வெற்றி பெற்று , முதல்வர் நவீன்பட்நாயக் அமைச்சரவையில் தகவல் தொழில்நுட்பத்துறை அமைச்சராக பொறுப்பேற்றார். எனினும் இவருக்கு எப்படியேனும் 12-ம் வகுப்பு படிக்க வேண்டும் என்ற ஆர்வம் குறையவில்லலை. இந்நிலையில் ஒடிசா மாநிலத்தின் அரசுத்தேர்வுகள் கடந்த 12-ம் தேதி முதல் 20-ம் தேதி வரை 10-ம் வகுப்பிற்கும், 12-ம் வகுப்பிற்கு நடந்தது. இதில் அமைச்சர் ரமேஷ்சந்திர மஜ்கி , தனது சொந்த மாவட்டமான நவரங்பூராவில் உள்ள பானபீடா மகாவித்யாலயா ‌பள்ளியில் இவருக்கு தேர்வு எழுத ஹால்டிக்கெட் வழங்கப்பட்டிருந்தது. தனி அறை ஒதுக்கப்பட்டு தேர்வு எழுதினார். நேற்று தேர்வு முடிகள் வெளியாயின. இதில் அமைச்சர் தேர்ச்சி பெற்றுள்ளதாக அறிவிக்கப்பட்டது. இதைத்தொடர்நது அவருக்கு சக அமைச்சர்கள், உறவினர்கள் பாராட்டு தெரிவித்தனர். இது குறித்து அமைச்சர் கூறுகையில், தேர்வில் வெற்றி பெற்றது எனக்கு மகிழ்ச்சி அளிக்கிறது. சட்டமன்ற பட்ஜெட் கூட்டத்தொடர் நடநது கொண்டிருந்த நேரத்தில் தேர்வு தேதி ‌அறிவிக்கப்பட்டதால் சிரமம் பார்க்காமல் தேர்வு எழுதினேன். மேற்கொண்டு பட்டப்படிப்பு படிக்க இருப்பதாக தெரிவித்தார்.

காமன்வெல்த் போட்டிகளில் நடந்த முறைகேடுகள் குறித்து விசாரணை நடத்திய ஷூங்லு கமிட்டி அளித்த அறிக்கையின் அடிப்படையில், டில்லி முதல்வர் ஷீலா தீட்சித் உட்பட பலர் மீது விசாரணை நடத்த சி.பி.ஐ.,க்கு உத்தரவிட வேண்டும் என, பாரதிய ஜனதா கட்சியினர் வலிறுத்தியுள்ளனர். காமன்வெல்த் போட்டி ஏற்பாடுகளில் நடந்த முறைகேடுகள் குறித்து விசாரணை நடத்த, ஷூங்லு கமிட்டியை பிரதமர் மன்மோகன் சிங் நியமித்தார். விசாரணைக்குப் பின், இக்கமிட்டி அளித்த அறிக்கையில்,"டில்லி அரசின் தவறான நடவடிக்கையால் 25 ஆயிரம் கோடி ரூபாய் பொது பணம் வீணடிக்கப்பட்டுள்ளது' என, குற்றம்சாட்டியிருந்தது. இதையடுத்து, டில்லி முதல்வர் ஷீலா தீட்சித் உட்பட பலரையும் விசாரணைக்கு உட்படுத்த, சி.பி.ஐ.,க்கு உத்தரவிடக்கோரி, பாரதிய ஜனதா கட்சியினர் நேற்று, ஜந்தர் மந்தர் பகுதியில் போராட்டத்தில் ஈடுபட்டனர்.

டில்லி பா.ஜ., தலைவர் விஜேந்திர குப்தா தலைமையில் நடந்த போராட்டத்தில், ஏராளமானோர் பங்கேற்றனர். குற்றம் சாட்டப்பட்டவர்கள் ஆதாரங்களை அழிப்பதற்கு முன்பாக, அனைத்து ஆவணங்களையும் கைப்பற்றி, சம்பந்தப்பட்டவர்கள் அனைவரிடமும் விசாரணை நடத்துவதற்கு சி.பி.ஐ.,க்கு உத்தரவிடவேண்டும் என, மத்திய உள்துறை அமைச்சர் சிதம்பரத்திற்கு கோரிக்கை வைத்தனர்.

சுர்ஜித் லால் மனு : காமன்வெல்த் போட்டி முறைகேடு தொடர்பாக, கைது செய்யப்பட்டுள்ள போட்டி அமைப்பு குழுவின் துணை பொதுச் செயலர் சுர்ஜித் லால், ஜாமின் கோரி, சிறப்பு கோர்ட்டில் மனு தாக்கல் செய்துள்ளார். இந்த மனு நேற்று விசாரணைக்கு வந்தது. நீதிபதி தல்வாந்த் சிங், மனு மீதான விசாரணையை வரும் 6ம் தேதிக்கு ஒத்திவைத்தார். இந்த வழக்கில் கைதாகியுள்ள போட்டி ஏற்பாட்டுக் குழுவின் தலைவர் கல்மாடி உட்பட ஐந்து பேரின் கோர்ட் காவல், வரும் 6ம் தேதியுடன் முடிவடைகிறது. கல்மாடி உட்பட சிலர் தாக்கல் செய்த மனு கடந்த 26ம் தேதி விசாரணைக்கு வந்தது. அப்போது, நீதிபதி பிறப்பித்த உத்தரவில்,"மனு தாக்கல் செய்த ஐந்து பேரின் வாதங்களை கேட்ட பின் தான் தீர்ப்பு வழங்கப்படும்' என்று குறிப்பிட்டிருந்தார்.

புதிய சட்டசபை தேர்வு செய்யப்பட்ட பின்னர் அ.தி.மு.க., அரசின் முதல் சட்டசபை கூட்டம் வரும் 3 ம் கவர்னர் உரையுடன் துவங்குகிறது. இந்த உரையில் புதிய அரசின் செயல்படுத்தப்படவிருக்கும் முக்கிய திட்டங்கள் குறித்த அறிவிப்புகள் இருக்கும். குறிப்பாக தேர்தல் வாக்குறுதியில் அளிக்கப்பட்ட தாலிக்கு இலவச தங்கம், மாணவ, மாணவிகளுக்கு இலவச லேப்டாப், உள்ளிட்ட திட்டம், எவ்வளவு காலத்தில் செயல்படுத்தப்படும் என்றும், மேலும் புதிய திட்டங்கள் தொடர்பான அறிவிப்புகளும் கவர்னர் உரையில் இருக்கும். இந்த உரையில் இடம்பெற வேண்டிய சரத்துக்கள் குறித்து முதல்வர் ஜெ., தலைமையில் இன்று நடந்த கூட்டத்தில் விவாதிக்கப்பட்டன. மின்வெட்டு சமாளிக்க தற்காலிக நடவடிக்கை குறித்தும் விவாதிக்கப்பட்டன.


கடந்த 16ம் தேதி சென்னை பல்கலை நூற்றாண்டு மண்டபத்தில் முதல்வராக ஜெ., பதவியேற்றார். அதன்பின், கடந்த 23ம் தேதி புதிய எம்.எல்.ஏ.,க்கள் பதவியேற்றனர். இதைத் தொடர்ந்து, 27ம் தேதி சபாநாயகர் தேர்தல் நடந்தது. வரும் 3ம் தேதி கவர்னர் உரையுடன் சட்டசபை கூட்டத்தொடர் துவங்குகிறது.

இங்கிலாந்து ராணி கிரீடம் சின்னம் பொறிக்கப்பட்ட முத்திரை கட்டை புழக்கத்தில் இருந்து வருகிறது.

ஆங்கிலேயர் ஆட்சியில் தபால் துறை, ரயில்வேதுறை, நெடுஞ்சாலை மற்றும் போக்குவரத்துத் துறை, பொதுப்பணித்துறை மற்றும் வருவாய்த்துறை என அனைத்து துறைகளும் அறிமுகம் செய்யப்பட்டு செயல்பட்டது. இவர்களின் காலத்தில், வருவாய்த் துறையில் முத்திரை கட்டைகளின் மூலம் சீல் வைக்கும் வழக்கம் அறிமுகம் செய்யப்பட்டது.

சுதந்திரம் அடைந்து 60 ஆண்டுகளுக்கு மேலாகியும், இன்றும், பெரும்பாலான அரசுத்துறை அலுவலகங்கள் ஆங்கிலேயர் கால கட்டித்தில் இயங்கிவருகிறது. ஆங்கிலேயர் பயன்படுத்திய முத்திரையில், இங்கிலாந்து ராணியின் கிரீடம் சின்னமும், ஆர்.சி., என்ற ஆங்கில எழுத்தும், சிலுவை சின்னமும் இடம்பெற்றிருக்கும். இந்த முத்திரைக் கட்டை, இன்றும் ஈரோடு ஆர்.டி.ஓ., அலுவலகத்தில் பயன்படுத்தப்படுகிறது. தரமான மரத்தால் ஆன, பித்தளையில் முத்திரை கொண்ட இந்த கட்டை இவ்வளவு காலமும், புதிதாக உள்ளது.
ஆட்சி மாறினாலே, பழைய திட்டங்களை தூக்கி எறியும் இந்தக் காலத்தில், ஆங்கிலேயர் ஆட்சிக் காலத்தில் பயன்படுத்திய முத்திரை கட்டையை பத்திரமாக பாதுகாத்து, இன்று வரை பயன்படுத்தி வருவது ஆச்சர்யம் தருகிறது.
இதுபற்றி ஆர்.டி.ஓ., சுகுமார் கூறுகையில்,
இங்கிலாந்து ராணி கிரீடம் பொறித்த முத்திரை கட்டை ஆர்.டி.ஓ., அலுவலகத்துக்கு சொந்தமானது. இந்த முத்திரை கட்டையை நீண்ட காலமாக வைத்து பயன்படுத்தி வருகிறோம். ஆங்கிலேயர் கால கட்டிடத்தை போலவே, எங்கள் அலுவலக கட்டிடமும் அமைந்துள்ளது. தூண்கள் அனைத்தும் அவர்களது காலத்தை நினைவு படுத்தும் வகையிலேயே உள்ளன. ஆங்கிலேயர் காலப் பொருளை 60 ஆண்டு காலத்துக்கு மேல் பாதுகாத்து வைத்து, இன்றும் பயன்படுத்துவது பெருமைக்குறிய விஷயம். இந்த முத்திரைக்கான வரலாறு பற்றி, இங்கு உள்ளவர்கள் யாருக்கும் தெரியாது.
இவ்வாறு அவர் கூறினார்.

"சொட்டு நீர் பாசன கருவி மானியத்தொகையில் விவசாயிகளை அரசு ஏமாற்றுகிறது,'' என, அரக்கன்கோட்டை பாசன விவசாயிகள் சங்க தலைவர் தளபதி குற்றம் சாட்டினார். ஈரோடு மாவட்ட விவசாயிகள் குறைதீர் கூட்டம் கலெக்டர் காமராஜ் தலைமை வகித்தார்.


அரக்கன்கோட்டை பாசன விவசாயிகள் சங்க தலைவர் தளபதி பேசியதாவது: தமிழகத்தில் சொட்டு நீர் பாசன சாகுபடியில் ஈரோடு மாவட்டம் முன்னிலை பெற்றுள்ளது. தென்னை, கரும்பு, மஞ்சள், வாழை என பயிர்கள் சாகுபடிக்கு சொட்டு நீர் பாசனம் அமைக்க மத்திய அரசு 40 சதவீதம், மாநில அரசு 25 சதவீதம் என, 65 சதவீதம் மானியம் அளிக்கிறது. சொட்டு நீர் பாசன கருவி அமைக்க 22 நிறுவனங்கள் அரசு அங்கீகாரம் பெற்றுள்ளன.


 ஒவ்வொரு பயிருக்கும் ஏற்றபடி, ஒரு ஏக்கருக்கு இவ்வளவு ரூபாய் செலவாகும் என, அதிகாரிகளே நிர்ணயித்துள்ளனர். உதாரணத்துக்கு, கரும்புக்கு சொட்டு நீர் பாசனம் கருவி அமைக்க ஒரு ஏக்கருக்கு 40 ஆயிரம் ரூபாய் செலவாகிறது என்றால், அதில் 65 சதவீதம் மட்டும் மானியம் அளிக்கப்படுகிறது. ஆனால், அதிகாரிகள் கூறும் வகையில் 40 ஆயிரம் ரூபாய்க்குள் அச்செலவு முடிவதில்லை. அதற்கு மேலாகும் தொகையை விவசாயிகள் தான் இதுவரை செலுத்தி வந்தனர். 40 ஆயிரம் ரூபாய்க்கு மட்டுமே 65 சதவீதம் மானியம் வழங்கி, விவசாயிகளை அரசு ஏமாற்றி வருகிறது. சொட்டு நீர் பாசன கருவி அமைக்க விவசாயிகளிடம் குறிப்பிட்ட தொகைக்கு மேல் வாங்கினால், அந்நிறுவனத்தின் அங்கீகாரம் ரத்து செய்யப்படுமென அரசு அறிவித்தது. அதனால், இரு மாதமாக சொட்டு நீர் பாசனம் அமைக்க எந்த நிறுவனமும் முன் வரவில்லை. எனவே, விவசாயிகள், நிறுவனங்களின் அதிகாரிகள், வேளாண் அதிகாரிகள் என, முத்தரப்பு குழு அமைத்து, தமிழகம் முழுவதிலும் சில மாவட்டங்களை தேர்வு செய்து, அங்கு குறிப்பிட்ட பயிர்களுக்கு, சொட்டு நீர் பாசன கருவி அமைத்து, எவ்வளவு செலவாகிறது என்பதை கண்டறிந்து, அதன்படி தான் மானியம் வழங்கும் தொகையை நிர்ணயிக்க வேண்டும்.


அப்போது தான், இத்திட்டத்தின் முக்கிய நோக்கமான நீர் சிக்கனம், மின் சிக்கனம், ஆட்கள் பற்றாக்குறை சரி செய்வது என்பது நிறைவேறும். அதேபோல், சில மாவட்டங்களில் சொட்டு நீர் பாசனம் அமைக்க விவசாயிகள் முன் வருவதில்லை. அம்மாவட்டங்களுக்கு அதிகளவில் நிதி ஒதுக்கீடு செய்யாமல், சொட்டு நீர் பாசனம் அமைக்க முன் வரும் ஈரோடு, கோவை போன்ற மாவட்டங்களுக்கு அதிக நிதியை ஒதுக்க வேண்டும். நபார்டு திட்டத்தில் 17 கோடியில் 60 கி.மீ.,க்கு தடப்பள்ளி வாய்க்கால் பணி நடக்கிறது. அப்பணியை ஒருவருக்கு கொடுப்பதால், நிறைவேற்றுவதில் சிக்கல் வரும். நான்கு பேருக்கு என, பிரித்துக் கொடுக்க வேண்டும் என கூறினோம்.


ஆனால், ஒருவருக்கே இப்பணி கொடுத்ததால், நான்கு மாதமாகியும் பணி முடியவில்லை. கிளை வாய்க்காலில் தண்ணீர் வரவில்லை. பொதுப்பணித்துறை விரைந்து நடவடிக்கை எடுக்க வேண்டும். இவ்வாறு அவர் பேசினார்.