மஞ்சள் விளைச்சல் அதிகரிப்பு மற்றும் விலை வீழ்ச்சி காரணமாக தொடர்ந்து மஞ்சள் விலை குறைந்து கொண்டே வருகிறறது. சென்ற வாரத்தை விட, நேற்று ஆயிரம் ரூபாய் குறைந்ததால், விவசாயிகள் விற்பனை செய்யாமல் குடோன்களிலேயே ஸ்டாக் வைத்து விட்டு சென்றனர். சென்றாண்டு தங்கத்துக்கு நிகராக மஞ்சள் விலை அமோகமாக விற்றது. நடப்பாண்டு மஞ்சள் சீஸன் சென்ற ஜனவரி மாதம் துவங்கியது. ஈரோடு ஒழுங்குமுறை விற்பனை கூடம், வேளாண்மை கூட்டுறவு மஞ்சள் சங்கம், வெளிசந்தை, கோபி சொசைட்டி ஆகிய மஞ்சள் சந்தைகளுக்கு புதிய மஞ்சள் வரத்து அதிகளவு வரத்துவங்கியது. ஆனால், 2011ம் ஆண்டு துவக்கத்தில் இருந்து மஞ்சள் சந்தைகளுக்கு வரத்து அதிகரிக்க துவங்கியதால், விலையும் படிப்படியாக குறைந்தது. விவசாயிகள் விலை குறைவால், மார்க்கெட்டிலேயே இருப்பு வைத்து நல்ல விலை கிடைக்கும் போது விற்பனை செய்து வந்தனர். சென்ற ஐந்து மாதங்களுக்கு முன் 16,569 ரூபாய்க்கு விற்ற மஞ்சள், தற்போது 5,779 ரூபாய்க்கு விற்கப்படுகிறது. 10 ஆயிரத்து 790 ரூபாய் விலை சரிந்துள்ளது. போதிய விலை கிடைக்காததால், மார்க்கெட்டுக்கு எடுத்து வரும் மஞ்சளை, விவசாயிகள் குடோன்களில் இருப்பு வைக்கின்றனர். மார்க்கெட்டுக்கு வரத்தும் வெகுவாக குறைந்து வருகிறது. நேற்று, சென்ற வாரத்தை விட மஞ்சள் குவிண்டால் 1,109 ரூபாய் குறைந்தது. நேற்று மார்க்கெட் நிலவரப்படி ஒழுங்குமுறை விற்பனை கூடத்தில் விரலி மஞ்சள் குவிண்டால் 5,799 முதல் 7,761 ரூபாய், கிழங்கு 5,106ல் முதல் 6,779 ரூபாய்க்கு விற்பனையானது. சந்தைக்கு 286 மஞ்சள் மூட்டைகளில் 258 மூட்டைகள் விற்பனையானது. ஈரோடு சொசைட்டியில் விரலி 5898 முதல் 7,676 ரூபாய், கிழங்கு 5,568 முதல் 7,676 ரூபாய்க்கு விற்றது. 427 மூட்டைகள் வரத்தானதில் 287 மூட்டைகள் விற்பøøயானது. கோபி சொசைட்டியில் விரலி 5,827 முதல் 7,670 ரூபாய், கிழங்கு 5,769 முதல் 7,069 ரூபாய்க்கு விற்பனையானது. 237 மூட்டைகள் வரத்தானதில் அனைத்தும் விற்பனையானது. விலை வீழ்ச்சி மற்றும் விளைச்சல் காரணமாக நடப்பாண்டு 5,000 ரூபாய் வரை மஞ்சள் விலை போகும். அடுத்தாண்டு மேலும் வரத்து அதிகரிக்க உள்ளதால், 4,000 ரூபாய் மட்டுமே விலை கிடைக்கும் என மார்க்கெட் விற்பனைக் குழு நிர்வாகிகள் தெரிவிக்கின்றனர்.

வரி செலுத்தாமல் ஏய்ப்போரை கண்டுபிடிக்கவும், அவர்களை பற்றிய விவரங்களை பொதுமக்களுக்கு தெரிவிக்கவும், அவர்களிடமிருந்து வரி பாக்கிகளை வசூலிக்கவும், தேவையான ஆலோசனைகளை வழங்குவதற்காக, புதிதாக ஒரு குழுவை மத்திய நிதியமைச்சகம் நியமித்துள்ளது. வரி ஏய்ப்போர் பெயரை பகிரங்கமாக வெளிப்படுத்தவும் இக்குழு அரசுக்கு ஆலோசனை கூறும்."கறுப்புப் பண அபாயத்தை ஒழிக்க, மத்திய அரசு போதிய நடவடிக்கை எடுக்கவில்லை' என, சமூக பிரதிநிதிகள் கடுமையாக விமர்சித்து வருகின்றனர்.

இந்த கறுப்புப் பண பிரச்னை தொடர்பாகவும், ஊழலுக்கு எதிராக போராட்டம் நடத்திய யோகா குரு பாபா ராம்தேவ் மீது மத்திய அரசு கடும் நடவடிக்கை எடுத்ததற்கு எதிர்ப்பு தெரிவித்தும், டில்லி ராஜ்காட்டில் சமூக சேவகர் அன்னா ஹசாரே நேற்று உண்ணாவிரதம் இருந்தார்.இந்த சூழ்நிலையில், கறுப்புப் பண பிரச்னையை கையாள்வதற்காக மற்றொரு குழுவை மத்திய அரசு நியமித்துள்ளது.கறுப்புப் பணத்தை பறிமுதல் செய்யவும், அதை தேசிய சொத்தாக அறிவிக்கவும் தேவையான சட்ட வரையறைகளை உருவாக்குவதற்காக, கடந்த மாதம் உயர்மட்டக் குழு ஒன்றை மத்திய அரசு அமைத்தது.இந்நிலையில், மீண்டும் ஒரு குழு அமைக்கப்பட்டுள்ளது. வருமான வரித்துறை டைரக்டர் ஜெனரல் (நிர்வாகம்) அனிதா கபூர் தலைமையிலான இந்தக் குழு, வரி ஏய்ப்போரை கண்டுபிடிப்பது, அவர்களை பற்றிய விவரங்களை பொதுமக்களுக்கு தெரிவிப்பது, அவர்கள் செலுத்த வேண்டிய வரி பாக்கிகளை வசூலிப்பது தொடர்பான ஆலோசனைகளை வழங்கும்.

வரி ஏய்ப்பு செய்துவிட்டு தலைமறைவாக இருப்போரை கண்டுபிடிக்க, தனியார் ஏஜன்சிகளை பயன்படுத்துவது மற்றும் பினாமி பெயரில் உள்ள சொத்துக்களை கண்டுபிடிப்பது தொடர்பாகவும் ஆய்வு செய்து, இந்த குழுவினர் பரிந்துரைகளை வழங்குவர்.நிதி உளவுப் பிரிவு மற்றும் வருமான வரித்துறை இயக்குனரகத்திற்கு கிடைத்துள்ள தகவல்கள் அடிப்படையில், நிலுவையில் உள்ள வரி பாக்கிகளை வசூலிக்க, என்னென்ன வழிமுறைகளை பின்பற்றலாம்; தொடர்ச்சியாக வரி செலுத்தாமல் ஏய்ப்போரின் பெயர்களை பகிரங்கமாக பொதுமக்களுக்கு தெரியும் வகையில் எப்படி வெளியிடலாம்; வரி ஏய்ப்போர் பற்றி தகவல் கொடுப்போருக்கு சன்மானம் வழங்கும் திட்டத்தை அறிவிக்கலாமா போன்றவை தொடர்பாகவும் ஆலோசனைகளை வழங்கும். இந்த கமிட்டி இரண்டு மாதத்திற்குள் தன் அறிக்கையை சமர்ப்பிக்கும்.